Ushairi si uzee

      USHAIRI SI UZEE

Tuepuke kukariri, muda ushabadilika

Ujuzi wa ushairi, upo kwenye kila rika 

Acha nivunje pingiri, watu waliyoiweka
Ushairi si uzee, dhana potofu ondoa.

Wapo vijana wazuri, mafundi wanosifika 

Watungao Kwa urari, shairi likaimbika

Tenzi zao machachari, hazina chembe ya shaka

Ushairi si uzee , dhana potofu ondoa.

Sasa tungo ni titiri, waleo wanaandika,

Zinazovuka bahari, watu wakaelimika

Bara nako zanzibari, watunzi wamemwagika

Ushairi si uzee, dhana potofu ondoa.

Wamo wakongwe hodari, hili linafahamika

Watungiapo habari, msomaji humteka

Pamwe huoni dosari, kama sauti ya dhika 

Ushairi si uzee, dhana potofu ondoa.

Yapasa kutafakari, kisha ndio kutamka 

Mshairi ni tajiri, wa lugha sio miaka

Atumie umahiri, ujumbe uweze fika,

Ushairi si uzee, dhana potofu ondoa.

Ilikuwa ni dhamiri, ya somo kulipeleka 

Jamii ipate kheri, dhana mbaya kutoweka

Wala isiwe shubiri, lengo mkakengeuka

Ushairi si uzee, dhana potofu ondoa.

Mshairi Machinga, 

mfaumehamisi@gmail.com,

0677620312/0716541703,

Dar es salaam, Kariakoo.