MUME AMEKUIBIA

                     MUME AMEKUIBIA 

Mama Joti! Mama Joti!, hebu njoo mara moja 

Wala usije na kiti, naharaka sitangoja 

Tena uvae thabiti, ukatazame vihoja 

Mwivi uliyemfuga, mume amekuibia.

Niliyoyaona huko, kuyasema ni aibu 

Kaibiwa mume wako, na rafiki yako Tabu 

Ajifanya dada yako, huku anakuadhibu 

Mwivi uliyemfuga, mume amekuibia.

Katika mihangaiko, ndipo nikapita Baa

Nikawakuta mwenzako,pembezoni wamekaa 

Walishana kwa vijiko, supu ya pweza na taa 

Mwivi uliyemfuga,  mume amekuibia.

Nikajibanza pembeni, ili kuwahakikisha 

Nikawaona machoni, hapo nikathibitisha 

Tabu na wako mwandani, penzi wameliotesha 

Mwivi uliyemfuga, mume amekuibia.

Sikuacha kuwawinda, kwa mwendo wa nyatu nyatu 

Mpaka gesti wakenda, kule ghorofa ya tatu 

Kulisakata kandanda, kwa kujifutua futu 

Mwivi uliyemfuga, mume amekuibia.

Kweli kinguoni mwako, kikulacho ndani ndani

Wakati wala ukoko, wao wapo zao  pwani

Wanavifanya vituko, wewe uko taabani, 

Mwivi uliyemfuga, mume amekuibia.

Kisha nikapata wazo, ujumbe kukuletea 

Habari yenye mjazo, ya yote yaliyotokea

Nawe ujue tatizo, vipi utalitatua?,

Mwivi uliyemfuga, mume amekuibia.

Unakumbuka lakini, ulichomfanya jeni 

Aliposema jamani, bwana wake hamuoni,

Ukambeza moyoni, kumbe unae chumbani 

Mwivi uliyemfuga, mume amekuibia.

Basi mimi naondoka, bali nyamaza kulia 

Wawahi wasije toka, ukweli ukapotea 

Tena ufanye haraka, hata mbio kukimbia

Mwivi uliyemfuga, mume amekuibia.

Malipo ni Duniani, akhera kuesabia 

Jambo hili aminini, ndugu zangu nawambia 

Kumuogopa MANANI, ndio mpango sawia 

Mwivi uliyemfuga, mume amekuibia.

Mshairi Machinga,

mfaumehamisi@gmail.com,

0716541703/0677620312,

Dar es salaam,Kariakoo.