USHAIRI NA SAYANSI,NINGELISOMA SAYANSI

          NINGELISOMA  SAYANSI

Lile neno ningejua, huja mwisho wa safari 

Leo ndio nang'amua,  Shari Kamili si  kheri 

Sina ninachoambua, zaidi ya kusubiri

Ningelijua mapema, ningelisoma sayansi.

Tumejikuta ni wengi, mpaka tuko ziada

Tukaukosa  msingi ,wakuendana na muda

Mfumo hatuukongi, ndomana twapata shida 

Ningelijua mapema, ningelisoma sayansi.

Ningechukua  hesabu,  fizikia  na kemia

Ningekesha na vitabu, kutwa nikijisomea

Nisingeipata tabu,  ya kazi kujipatia

Ningelijua mapema, ningelisoma sayansi.

Ningeshinda maabara, vitendo kuthibitisha

Nikiwapasua vyura, na kisha kuwaponesha

Ningepata kazi bora, yenye pesa za  kutosha

Ningelijua mapema, ningelisoma sayansi.

Sayansi ina nafasi, kwa uchumi wa viwanda

Uwe hata kandarasi, kila uchwao ni tenda

Kwingine ni sarakasi, sio kama ninaponda 

Ningelijua  mapema, ningelisoma sayansi.

Wote  ninawaambia,  mlioko mashuleni

Sayansi kushikilia,mkisoma chimbueni

Msuli kuikazia, msifanyie utani 

Ningelijua mapema, ningelisoma sayansi.

Mkopo  mtaupata, pasipo kipingamizi

Mia mtaziburuta, bila ya vichachawizi

Ajira zitajileta, ziko nyingi wazi wazi

Ningelijua mapema, ningelisoma sayansi.

Shairi nahitimisha ,nishatoa ushauri 

Sijatunga kupotosha,mengine kuyakejeri

Sihitaji kurefusha,  Nikaimaliza ari 

Ningelijua mapema, ningelisoma sayansi.

Mshairi Machinga, 

mfaumehamisi@gmail.com,

0716541703/0677620312.

Dar es salaam, Kariakoo.