Tabia ya muungwa- Hamisi Kisamvu Mkanyaji

            TABIA YA  MUUNGWANA

Kuno kunena kunena, leo nalinena hili

Nalinena kwa mapana, kwa lugha ya kiswahili

Tabiaze muungwana, si mtu wa ndimi mbili

Kutosheka na akali, tabia ya muungwana.

Nawala hawi mpana, hujiona yu dhalili

Subira imejazana, zimetuwama akili

Kidogo atachovuna, hajipandishi manzili

Kutosheka na akali, tabia ya muungwana.

Ni mbali ametengana, nazo hasira za mali

Hufanya mambo kwa kina, na kukumbuka ayali

Si mambo kujalizana, moyowe huona dhuli

Kutosheka na akali, tabia ya muungwana.

Hasa alo muungwana, si mtamani batili

Uchache kwenye hazina, wala haoni fiili

Hujibanza kwa Rabana, kwa visimamo laili

Kutosheka na akali, tabia ya muungwana.

Na waja atagawana, japo na kiwe kalili

Huwa hapendi kuona, wakinyongeka ahali

Changi ni kuchangizana, hiyo ndioye sabili

Kutosheka na akali, tabia ya muungwana.

Yeye hutafuta Janna, thama kashika adili

Hawi mwenye kujivuna, kwa afanyazo fadhili

Huwa ni mwema msena, kwa matendo na kauli

Kutosheka na akali, tabia ya muungwana.

Hapa tama ya kutona, kalamu yangu mvuli

Wenye macho wataona, hayano yana kulali

Ila walo na hiyana, si lazima kukubali

Kutosheka na akali, tabia ya muungwana.

MKANYAJI

HAMISI A. S KISSAMVU

0715311590/0784311590

kissamvujr@ gmail.com

    .   kutoka

     (Baitu shi'ri)

    DAR ES SALAA