Safari ya Mwimbe na Maddie,toka Tanzania hadi Kenya

Naandika msikucha, yangu hii bembelezi,
Nimpe asojificha, si mwingine taazizi,
Ni wewe uso na ncha, katika yangu mapenzi,
Nipende kila kukicha, wasojuwa wamaizi.

Ewe kwangu ndo machicha, si ya dafu bali nazi,
Ewe usojuwa chucha, kwenye huba ni mwawazi,
Endeleza kwachakwacha, mahaba jozi kwa jozi,
Epuka vilivyochacha, visitutie ghamizi.

Yeyote hasidikucha, atoanza uchochezi,
Yekeyeke kutuchocha, penzi liwe na gumbizi,
Yani nitamndondocha, ndo halaliye majazi,
Yarabi zidi tuficha, wasituone walozi.

Zia mithili ya picha, hurulaini azizi,
Zenana ukipekecha, wanikosha mliwazi,
Zaujati sitokwacha, nimeziba masikizi,
Zuhudi kweli kumcha, iwe yetu kiombozi.

Ewe ndiye wangu pacha, ni egamo kwanyi ngazi,
Emi wangu kutwa kucha, kila saa kila mwezi,
Ekeza kila kukicha, huba mashazi mashazi,
Elewa nilichoficha, kwako kamwe sipotezi.

Rafathi ilojificha, hivi leo sio njozi,
Ruya unayoiacha, moyoni mwangu iwazi,
Ringa pasipokuwacha, sasa uwangu mkazi,
Ridhia japo mchicha, siku nikikosa mbuzi.

Idd M. Mwimbe
"Mtenzi"
(Mzee wa Shughuli)
"Maalim Muwasho"
+255716780803
Bagamoyo.

Kata nyama wangu bucha, iwe kama kumbukizi,
Panga skwodi ndiwe kocha, niwe safu ya ulinzi,
Sitokuja kukuacha, ulienifanya chizi,
Mi kitesa wa funguo, hili penzi la wawili.

Piga pozi za kipicha, hapo chini ya mnazi,
Keti pasi kupekecha, mtambaji wa tondozi,
Tena nikukate kucha, wasojua wamaizi,
Kidani changu shingoni, sikutoi hamamuni.

Baki nami kukichacha, uwe kama kikurunzi,
Kesho kama kukikucha, mambo yatavuta kazi,
Yasiwe ya alinacha, yakiisha usingizi,
Tukipata chamchana, chajio bugia maji.

Nifunde maisha ticha, n'ache kuburuza ngazi,
Sunda pakacha pakacha, usinifungie nyuzi,
Ya funguo huwa kicha, yetu iwe ya azizi,
Panda palilia penzi, ipate na kunawiri.

Tandikia japo mbacha, napenda kupiga tizi,
Kunao wapenda chocha, warushao vilipuzi,
Wao wahifadhi mocha, pamwe na zao hirizi,
Tupendane tushibane, wasopenda iwakosti.

Uledi Bryan
Kinda Mtunga Nudhuma
Kericho-Kenya
Simu_+254 724845351