Mahari mloitaja ni hatari kwangu

               MAHARI MLIYOTAJA

Lo! sitaki natamka, bila jicho kupepesa,

Hakika nimechemka, bora mke kumkosa

Nakubali kuumbuka, heri niitwe garasa

Mahari mliyotaja , kuilipa sitaweza.

Hali yenyewe masika, mfukoni sina pesa 

Ni wazi ninaropoka, najuta kuleta posa

Sijali mkinicheka, nakubali nimenasa 

Mahari mliyotaja, kuilipa sitaweza.

Si baba wala si kaka, mwenye hao ng'ombe tisa

Mama mshona mikeka, dada mcheza kibisa 

Nami mziba viraka, mbona mnatunyanyasa?

Mahari mliyotaja, kuilipa sitaweza.

Ni vingi mlivotaka, vingine ni vya anasa 

Mkaja ,suti ,mashuka, mbuzi kumi wa kisasa

Majembe, panga, na shoka, mchumba ninamsusa 

Mahari mliyotaja, kuilipa sitaweza.

Kanga, pombe kadhalika, mmenitoa hamasa

Kwa hilo sijarizika, Kwa huo wenu usasa

Na mbio nazitimka, ya nini kuweka hisa

Mahari mliyotaja, kuilipa sitaweza.

Kinyonge nasononeka, naimaliza kurasa

Mipango imetoweka, ya kumuoa Hamisa

Machinga ninaondoka, nimeshafikisha kisa

Mahari mliyotaja, kuilipa sitaweza.

Mshairi Machinga, 

mfaumehamisi@gmail.com,

+255677620312/+255716541703,

Dar es salaam, kariakoo.