Je ni haramu kupiga kidaku nyakati za usiku

1)Mimi nataka kujua,kuuliza si ujinga

Swali nalipambanua,kusikiza najipanga

Masikio nainua,Leo nitoke na mwanga

Eti kupiga kidaku,ilikuwa ni haramu ?

2)Daku walituhamsha,kwa qaswida wakiimba

Mtaa kachangamsha,dini kaoneka simba

Nani amewafurusha,tuwaoni wakitamba

Eti kupiga kidaku,ilikuwa ni haramu ?

3)Usiku walizunguka,ni mola aliwachunga

Kwa mbali walisikika,kwa qaswid walotunga

Mtani wametoweka,ni Nani alowadunga

Eti kupiga kidaku,ilikuwa ni haramu ?

4)Wale wahamsha daku,so kwamba ninawafumba

Siwaoni tena huku,ama wameenda Pemba

Au kupiga usiku,wanawaogopa mamba

Eti kupiga kidaku,ilikuwa ni haramu ?

5)Ama shida ni madufu,ndo yaloleta majanga

Hapo wakafua dafu,Kule ikatupwa nanga

Kapoteza maarufu,kidaku wakamfunga

Eti kupiga kidaku,ilikuwa ni haramu ?

6)Au hivi ni haramu,nogopa sije nizomba

Nahamu niifahamu,ili mambo yawe bomba

Nauliza kinidhamu,na majibu nayaomba

Eti kupiga kidaku,ilikuwa ni haramu ?

SHAIRI- KUPIGA KIDAKU

MTUNZI-Idd Ninga,Arusha

+255624010160

iddyallyninga@gmail.com