NAMPENDA MWANAJESHI

NAMPENDA MWANAJESHI

1)Mzuri anapendeza,sura ye yanivutia
nawaza kama ntaweza,ukweli kumuambia
naota anikimbiza,bunduki anashikia
Ukweli bora eleza,akili yaniambia
nampenda mwanajeshi,naogopa mtongoza

2)Mtani anapopita, magwanda kajivalia
moyo wangu unasita,hata kumsogelea
mtoto kwanza sa sita,ndo kwanza imewadia
Kweli nitafurukuta,kama akinkubalia
nampenda mwanajeshi,naogopa mtongoza.

3)Anayo njema heshima,maadili anajua
nawaza nseme mapema,tatizo pakuanzia
mpaka ninapata homa,kila nikifikiria
kichwa nacho kinauma,ninazidi kuumia
nampenda mwanajeshi,naogopa mtongoza.

4)Anapigiwa saluti,heshima wamtolea
siwazi kumsaliti,siku nikija muoa
hata wavaao suti,bado wanamkimbia
nyororo yake sauti,pindi anapoongea
nampenda mwanajeshi,naogopa mtongoza

5)Endesha dege la jeshi,angani ajipaia
uso kama muhabeshi,Arusha twakutania
mwongeaji na mcheshi,napenda kumtania
ila shida mwanajeshi,bastola ajibebea
nampenda mwanajeshi,naogopa mtongoza.

6)Amanitume rafiki,aende muelezea
naogopa unafiki ataweza kuzengea
ili niepushe chuki,labda tajikakamua
sitaki moyo wa dhiki,mapenzi kuyakimbia
nampenda mwanajeshi,naogopa mtongoza.

SHAIRI-Nampenda mwanajeshi
MTUNZI-Idd Ninga wa Tengeru Arusha
+255624010160
iddyallyninga@gmail.com