Asema:sing'ooki NG'O ! ! ! ! ! ! ! ! !

yanilazimu nicheke, mtakapo kunitoa,
Na mwingine mumuweke, baada ya kuning'oa
Mnazua sekeseke, ili nibaki na doa,
sing'oki ng'o !!

Mnaufukiza moshi, kwangu paweze ungua,
Kwa nguvu ya ushawishi, ugomvi mnanunua,
Nyie ni wagombanishi, kitambo nishawajua,
Sing'oki ng'o !!

Sijui ni malighafi, ndizo zinawazuzua,
Mnaleta ukorofi, muweze kuzichukua,
Muufanyao ulafi, matumbo kuyafutua,
Sing'oki ng'o !!

Pazeni sana sauti, mzidi kunichafua,
Mkileta tashititi, mtadondokea pua,
Kwani nimejizatiti, mkija nawalipua,
Sing'oki ng'o !!

Mnajifanya wasafi, kweli mnaangazia,
Ili mambo yawe safi, pindi mkinivamia,
Muwavue wangu chafi, huku nikiangalia,
Sing'oki ng'o !!

Sijafunzwa kuogopa, pindi ninapoonewa,
Hata kama nimekopa, na deni ninadaiwa,
Eti kisa nyie papa, mtake kuogopewa? ,
Sing'oki ng'o !!


Kaditama ndio hapa, mdomo wangu nafunga,
Kwa mola wangu naapa, yeye kwangu ndie kinga,
Mkija tunazichapa, kwa mitutu na mapanga,
Sing'oki ng'o !!

Mshairi Machinga, 
mfaumehamisi@gmail.com, 
0716541703/0677620312,
Dar es salaam, kkoo.